پەڕی 106ەم

جووتێ سەرپێیی


لە نێوان ئەو هەزار جووت پێڵاوەی لەبەردەم هۆڵەكە داكەندرابوون، جووتێ سەرپێیی زۆربڵە، یانی نەعلی چەنەباز، چاوەڕوانی منیان دەكرد تا بێمە دەرێ، لەپێیان بكەم و بیانبەمەوە.

پێڵاوەكان هی ئەو جەماعەتە بوون وا لە شاخ گەڕابوونەوە. پێڵاو یانی كەوش.

بۆڵە بۆڵی نێو هۆڵەكە بە باشی دەگەیشتە گوێی سەرپاییەكان.

قسە و باس و پێك هەڵپڕژان و هات و هاوارێك بوو نەبێتەوە.

ئەو شەوە دوایین جەماعەتی شاخ گەڕابوونەوە، كۆبوونەوەكە لەسەر ئەوان بوو. دیارە بابەتی سەرەكی شتێكی دیكە بوو، نەك گەڕانەوەی ئەوان.

 بابەتەكە پرسیارێك بوو كە ئەوە سەتەمین كۆبوونەوە بوو بۆ وەڵام دانەوەی دەگیرا.

سكرتێری جەماعەتی تازە گەڕاوە هەر لە خۆڕا قسەی زل زلی دەكرد. بۆخۆشی نەیدەزانی دەڵێ چی.

یەكێك هەستا و چەقۆكێشانە گوتی: باشە بەڕێز لێی ببڕەوە با بەرد نەبارێ!

بوو بە هەرا، هەر كەسە و لەبەر خۆیەوە دەینەڕاند، كەس لە كەس نەدەگەیشت. ئا ئیدی.. كەس بەكەس بوو.

سەرپاییەكە لە دڵی خۆیدا دەیگوت وەڵا كەر كەرێن پڕ بە پێستی خۆیەتی!

لە پڕ یەكێك قوت بۆوە و رووی كردە جەماعەتێكی دیكە و گوتی: ئێستا تۆ شەرەفتان ئەو رۆژنامەیەی جەماعەتی ئێوە، ئەو بەیانییە، ئەوە قسەبوو نووسیبووی؟!

هۆڵەكە بێدەنگ بوو.

سەرپاییەكان گوێیان هەڵخست.

هەموو لە دڵی خۆیاندا: چییان نووسیوە؟!

نووسیویانە: شۆڕمەزە فرۆشەكانی حەوز و مستەڕاح تەشكیلاتی نەهێنیی ئێمە بوون!!!

تەشكیلات شتێكە وەك رێكخستن.

لە پڕ سووخەن گووی جەماعەتێك هەستا و بە دەنگێكی گڕی رەهبەرانە گوتی: سەیرە...! ئەو كەسانەی تا دوێنێ لەگەڵ گورگ بوون، ئەمڕۆ ئیراد لە خەڵك دەگرن، وەك بڵێی هەمیشە لەگەڵ شوان بووون!!!

سووخەن گوو یانی وتەبێژ، رەهبەر یانی سەركردە، ئیرادیش یانی رەخنە، ئەوە روونكردنەوەیەكە بۆ ئەو میوانە بەڕێزانەی لەو دیورا هاتووون.

دیارە كەریش دەیزانی ئەم هەڵچوون و لەسەر كردنەوەیەی ئەو سووخەن گووە بەڕێزە، نان بەقەرزدان بوو، بەڵام دەی!

سەرپاییەكانیش هەروا بۆخۆیان خەریكی ورتە ورت بوون.

یەكێكەكەش لە وەڵامی سووخەن گووەكەدا گوتی: باش وایە ئێوەی لە گورگ هەڵێی شوان بەگا...

كاكە.. تكایە! تەكایە!! تەكایە!!! با كۆبوونەوەكەمان نەبێتە شەرە چەلەحانەی دووكەسی، با لە باسە سەرەكییەكەمان لانەدەین، ئێستا:

"گۆڕستانی شەهیدەكانمان لە كام شار بێ؟!"

سەرپاییەكان فشەیان بەو دۆخە دەهات و لەبەر خۆیانەوە دەیانگوت: باشە ئەوە باسی لەوە  گرنگ تر، پێویست تر و كاریگەرتریان پێشك نەدەهات ئەو بێ مێشكانە؟!؟!

دۆخ یانی وەزعییەت، گرنگ یانی مووهیم و زەرووری، گاریگەریش یانی تەئسیرگوزار، ئەمەش روونكردنەوەیەكە بۆ میوانانی ناوخۆ.

سەرپایی پێی راست گوتی: ئەمشەو مانگ زۆر خەمگینە، هەر لەبەر ئەوەش بووبێ هیچ ناقەومێ، خەمی ئەو كەرانەی ناوەوەت نەبێ!

سەرپایی پێی چەپ گوتی: هێواشتر قسە بكە هاوڕێ، من گومانم لەو كەوشە رەشە بریقەدارە واكس كراوانە هەیە، پێم وایە نفووزین.

هێواش یانی لەسەرەخۆ، نفووزیش یانی سیخۆڕ.. یانی جاش!!!

***

تێبینی: شێعری "رساله‌ی عشق"ی سید عەلی ساڵحی بوو بە هەوێنی ئەم چیرۆكە...